Dorias
Ita me Di ament, quantum ego illum vidi, nonnihil timeo misera
615
Ne quam ille hodie insanus turbam faciat, aut vim Thaidi.
Nam postquam iste advenit Chremes adolescens, frater virginis,
Militem rogat ut illum admitti iubeat: ille continuo irasci,
Neque negare audere: Thais porro instare ut hominem invitet.
Id faciebat retinendi illius causa, quia illa quae cupiebat
620
De sorore eius indicare ad eam rem tempus non erat.
Invitat tristis; mansit: ibi illa cum illo sermonem occipit.
Miles vero sibi putare adductum ante oculos aemulum:
Voluit facere contra huic aegre. Heus! inquit, puer, Pamphilam
Arcesse, ut delectet hic nos. Illa exclamat, Minime gentium!
625
In convivium illam? Miles tendere: inde ad iurgium.
Interea aurum sibi clam mulier demit; dat mihi ut auferam.
Hoc est signi; ubi primum poterit se illinc subducet, scio.
Phaedria
Dum rus eo coepi egomet mecum inter vias,
Ita ut fit ubi quid in animo est molestiae,
630
Aliam rem ex alia cogitare, et ea omnia in
Peiorem partem. Quid opus est verbis? dum haec puto
Praeterii imprudens villam: longe iam abieram
Cum sensi: redeo rursum, male vero me habens.
Ubi ad ipsum veni diverticulum, constiti.
635
Occepi mecum cogitare: Hem! biduum hic
Manendum est soli sine illa? quid tum postea?
Nihil est: quid? nihil? si non tangendi copia est,
Eho, ne videndi quidem erit? si illud non licet,
Saltem hoc licebit. Certe extrema linea
640
Amare haud nihil est. Villam praetereo sciens.
Sed quid hoc quod timida subito egreditur Pythias?
Pythias
Ubi ego illum scelerosum misera atque impium inveniam? aut ubi quaeram?
Hocine tam audax facinus facere esse ausum?
Phaedria
Perii! hoc quid sit vereor.
Pythias
Quin etiam insuper scelus, postquam ludificatus est virginem,
645
Vestem omnem miserae discidit; tum ipsam capillo conscidit.
Phaedria
Hem.
Pythias
Qui nunc si detur mihi,
Ut ego unguibus facile illi in oculos involem venefico.
Phaedria
Nescio, quid profecto absente nobis turbatum est domi.
Adibo. Quid istuc? quid festinas? aut quem quaeris, Pythias?
Pythias
650
Ehem, Phaedria, ego quem quaeram? ine hinc quo dignus es cum donis tuis
Tam lepidis?
Phaedria
Quid istuc est rei?
Pythias
Rogas me? Eunuchum quem dedisti nobis quas turbas dedit!
Virginem, herae quam dono dederat miles, vitiavit.
Phaedria
Quid ais?
Pythias
Perii.
Phaedria
Temulenta es.
Pythias
Utinam sic sient qui mihi male volunt.
Dorias
655
Au, obsecro, mea Pythias, quid istuc nam monstri fuit?
Phaedria
Insanis: qui istuc facere eunuchus potuit?
Pythias
Ego illum nescio
Qui fuerit: hoc quod fecit res ipsa indicat.
Virgo ipsa lacrimat, neque cum rogites quid sit, audet dicere.
Ille autem bonus vir nusquam apparet. Etiam hoc misera suspicor,
660
Aliquid domo abeuntem abstulisse.
Phaedria
660
Nequeo mirari satis
Quo ille abire ignavus possit longius; nisi si domum
Forte ad nos rediit.
Pythias
Vise amabo num sit.
Phaedria
Iam faxo scies.
Dorias
Perii! obsecro tam infandum facinus, mea tu, ne audivi quidem.
Pythias
At pol ego amatores mulierum esse audieram eos maximos,
665
Sed nihil potesse; verum miserae non in mentem venerat;
Nam illum aliquo conclusissem, neque illi commisissem virginem.
Phaedria
Exi foras, sceleste: at etiam restitas
Fugitive? prodi, male conciliate.
Dorus
Obsecro.
Phaedria
Oh,
Illud vide, os ut sibi distorsit carnufex.
670
Quid huc tibi reditio est? vestis quid mutatio?
Quid narras? Paulum si cessassem, Pythias,
Domi non offendissem; ita iam ornarat fugam.
Pythias
Habesne hominem amabo?
Phaedria
Quidni habeam?
Pythias
Factum bene!
Dorias
Istuc pol vero bene.
Pythias
Ubi est?
Phaedria
Rogitas? non vides?
Pythias
675
Videam? obsecro quem?
Phaedria
675
Hunc scilicet.
Pythias
675
Quis hic est homo?
Phaedria
Qui ad vos deductus hodie est.
Pythias
Hunc oculis suis
Nostrarum numquam quisquam vidit, Phaedria.
Phaedria
Non vidit?
Pythias
An tu hunc credidisti esse, obsecro,
Ad nos deductum?
Phaedria
Namque alium habui neminem.
Pythias
Au!
680
Ne comparandus hic quidem ad illum est: ille erat
Honesta facie et liberali.
Phaedria
Ita visus est
Dudum, quia varia veste exornatus fuit:
Nunc eo tibi videtur foedus, quia illam non habet.
Pythias
Tace, obsecro; quasi vero paulum intersiet.
685
Ad nos deductus hodie est adolescentulus,
Quem tu videre vero velles, Phaedria.
Hic est vetus, victus, veternosus senex,
Colore mustelino.
Phaedria
Hem, quae haec est fabula?
Eo redigis me ut quid egerim egomet nesciam.
690
Eho tu! emine ego te?
Dorus
690
Emisti.
Pythias
690
Iube, mihi denuo
Respondeat.
Phaedria
Roga.
Pythias
Venistine hodie ad nos? negat.
At ille alter venit, annos natus sedecim,
Quem secum adduxit Parmeno.
Phaedria
Age dum, hoc mihi expedi
Primum: istam quam habes unde habes vestem? taces?
695
Monstrum hominis! non dicturus es?
Dorus
695
Venit Chaerea.
Phaedria
Fraterne?
Dorus
Ita.
Phaedria
Quando?
Quam dudum?
Dorus
Modo.
Hodie.
Phaedria
Quicum?
Dorus
Cum Parmenone.
Phaedria
Norasne eum prius?
Dorus
Non; nec quis esset umquam audieram dicier.
Phaedria
Unde igitur fratrem meum esse scibas?
Dorus
Parmeno
700
Dicebat eum esse: is dedit mihi hanc vestem.
Phaedria
700
Occidi.
Dorus
Meam ipse induit: post una ambo abierunt foras.
Pythias
Iam satis credis sobriam esse me, et nihil mentitam tibi?
Iam satis certum est virginem vitiatam esse?
Phaedria
Age nunc bellua
Credis huic quod dicit?
Pythias
Quid isti credam? res ipsa indicat.
Phaedria
705
Concede istuc paululum: audin? etiam nunc paululum: sat est.
Dicdum hoc rursum: Chaerea tuam vestem detraxit tibi?
Dorus
Factum.
Phaedria
Et ea est indutus?
Dorus
Factum.
Phaedria
Et pro te huc deductus est?
Dorus
Ita.
Phaedria
Iupiter magne, o scelestum atque audacem hominem!
Pythias
Vae mihi!
Etiam nunc non credis indignis nos esse irrisas modis?
Phaedria
710
Mirum ni tu credas quod iste dicit: quid agam nescio.
Heus, negato rursum. Possumne ego hodie ex te exsculpere
Verum? vidistin fratrem Chaeream?
Dorus
Non.
Phaedria
Non potest sine
Malo fateri, video: sequere hac: modo ait, modo negat.
Ora me.
Dorus
Obsecro te vero, Phaedria.
Phaedria
I intro nunc iam.
Dorus
Oi, ei.
Phaedria
715
Alio pacto honeste quo modo hinc abeam nescio.
Actum est, siquidem tu me hic etiam, nebulo, ludificabere.
Pythias
Parmenonis tam scio esse hanc technam quam me vivere.
Dorias
Sic est.
Pythias
Inveniam pol hodie parem ubi referam gratiam.
Sed nunc quid faciendum censes, Dorias?
Dorias
De istac rogas
720
Virgine?
Pythias
720
Ita: utrum taceamne an praedicem? Dor. Tu pol, si sapis,
Quod scis nescis, neque de eunucho, neque de vitio virginis:
Hac re et te omni turba evolves, et illi gratum feceris.
Id odio dic, abisse Dorum.
Ita faciam.
Dorias
Sed videon Chremem?
Thais iam aderit.
Pythias
Quid ita?
Dorias
Quia cum inde abeo, iam tum inceperat
725
Turba inter eos.
Pythias
725
Aufer aurum hoc: ego scibo ex hoc quid siet.
Chremes
At at! data hercle verba mihi sunt: vicit vinum quod bibi.
Ac, dum accubabam, quam videbar mihi esse pulchre sobrius!
Postquam surrexi, neque pes neque mens satis suum officium facit.
Pythias
Chreme!
Chremes
Quis est? ehem Pythias. Vah, quanto nunc formosior
730
Videre mihi quam dudum!
Pythias
730
Certe tu quidem pol et multo hilarior.
Chremes
Verbum hercle hoc verum est; sine Cerere et Libero friget Venus.
Sed Thais multo antevenit?
Pythias
Anne abiit iam a milite?
Chremes
Iamdudum; aetatem: lites sunt inter eos factae maximae.
Pythias
Nihil dixit ut sequerere sese?
Chremes
Nihil, nisi abiens mihi innuit.
Pythias
735
Eho, nonne id sat erat?
Chremes
735
At nescibam id dicere illam; nisi quia
Correxit miles quod intellexi minus: nam me extrusit foras.
Sed eccam ipsam: miror ubi ego huic anteverterim.
Thais
Credo equidem illum iam adfuturum esse, ut illam a me eripiat. Sine veniat.
Atqui si illam digito attigerit uno, oculi ilico effodientur.
740
Usque adeo ego illius ferre possum ineptias et magnifica verba,
Verba dum sint: verum enim si ad rem conferentur, vapulabit.
Chremes
Thais, ego iam dudum hic adsum.
Thais
O mi Chreme, te ipsum exspectabam.
Scin tu turbam hanc propter te esse factam, et adeo ad te attinere hanc
Omnem rem?
Chremes
Ad me? qui, quaeso, istuc?
Thais
Quia, dum tibi sororem studeo
745
Reddere et restituere, haec atque huiusmodi sum multa passa.
Chremes
Ubi ea est?
Thais
Domi apud me.
Chremes
Hem, quid est?
Thais
Educta ita uti teque illaque dignum est.
Chremes
Quid ais?
Thais
Id quod res est.
Hanc tibi dono do, neque repeto pro illa quicquam abs te preti.
Chremes
Et habetur et referetur, Thais, a me ita uti merita es gratia.
Thais
750
At enim cave ne prius quam hanc a me accipias, amittas Chreme;
Nam haec ea est quam miles a me vi nunc ereptum venit.
Abi tu, cistellam, Pythias, domo effer cum monumentis.
Chremes
Viden tu illum, Thais—
Pythias
Ubi sita est?
Thais
In risco. Odiosa cessas?—
Chremes
Militem secum ad te quantas copias adducere?
755
Atat.
Thais
755
Num formidolosus obsecro es, mi homo?
Chremes
755
Apage sis:
Egon formidolosus? nemo est hominum qui vivat minus.
Thais
Atque ita opus est.
Chremes
Ah, metuo qualem tu me esse hominem existimes.
Thais
Immo hoc cogitato; quicum res tibi est peregrinus est,
Minus potens quam tu, minus notus, minus amicorum hic habens.
Chremes
760
Scio istuc. Sed tu quod cavere possis stultum admittere est.
Malo ego nos prospicere quam hunc ulcisci accepta iniuria.
Tu abi, atque obsera ostium intus, dum ego hinc transcurro ad forum.
Volo ego adesse hic advocatos nobis in turba hac.
Thais
Mane.
Chremes
Melius est.
Thais
Mane.
Chremes
Omitte; iam adero.
Thais
Nihil opus est istis, Chreme:
765
Hoc modo die, sororem illam tuam esse, et te parvam virginem
Amisisse; nunc cognosse. Signa ostende.
Pythias
Adsunt.
Thais
Cape.
Si vim faciet, in ius ducito hominem: intellextin?
Chremes
Probe.
Thais
Fac animo haec praesenti dicas.
Chremes
Faciam.
Thais
Attolle pallium.
Perii! huic ipsi est opus patrono quem defensorem paro.
Thraso
770
Hancine ego ut contumeliam tam insignem in me accipiam, Gnatho?
Mori me satius est. Simalio, Donax, Syrisce, sequimini.
Primum aedes expugnabo.
Gnatho
Recte.
Thraso
Virginem eripiam.
Gnatho
Probe.
Thraso
Male mulcabo ipsam.
Gnatho
Pulchre.
Thraso
In medium huc agmen cum vecti Donax;
Tu, Simalio in sinistrum cornu; tu Syrisce in dexterum.
775
Cedo alios: ubi centurio est Sanga, et manipulus furum?
Sanga
775
Eccum adest.
Thraso
Quid ignave? peniculon pugnare, qui istuc huc portes, cogitas?
Sanga
Egone? Imperatoris virtutem noveram et vim militum;
Sine sanguine hoc fieri non posse; qui abstergerem vulnera.
Thraso
Ubi alii?
Sanga
Qui, malum, alii? solus Sannio servat domi.
Thraso
780
Tu hosce instrue: hic ego ero post principia: inde omnibus signum dabo.
Gnatho
Illuc est sapere! ut hosce instruxit, ipsus sibi cavit loco.
Thraso
Idem hoc iam Pyrrhus factitavit.
Chremes
Viden tu Thais quam hic rem agit?
Nimirum consilium illud rectum est de occludendis aedibus.
Thais
Sane quod tibi nunc vir videatur esse hic nebulo magnus est.
785
Ne metuas.
Thraso
785
Quid videtur?
Gnatho
785
Fundam tibi nunc nimis vellem dari,
Ut tu illos procul hinc ex occulto caederes: facerent fugam.
Thraso
Sed eccam Thaidem ipsam video.
Gnatho
Quam mox irrimus?
Thraso
Mane.
Omnia prius experiri quam armis sapientem decet.
Qui scis an quae iubeam sine vi faciat?
Gnatho
Di vestram fidem!
790
Quanti est sapere ! numquam accedo quin abs te abeam doctior.
Thraso
Thais, primum hoc mihi responde; cum tibi do istam virginem
Dixtine hos mihi dies soli dare te?
Thais
Quid tum postea?
Thraso
Rogitas, quae mihi ante oculos coram amatorem adduxti tuum?
Thais
Quid cum illo agas?
Thraso
Et cum eo clam te subduxti mihi?
Thais
795
Libuit.
Thraso
795
Pamphilam ergo huc redde, nisi vi mavis eripi.
Chremes
Tibi illam reddat? aut tu illam tangas omnium—?
Gnatho
Ah, quid agis? tace.
Thraso
Quid tu tibi vis? ego non tangam meam?
Chremes
Tuam autem furcifer!
Gnatho
Cave sis; nescis cui nunc male dicas viro.
Chremes
Non tu hinc abis?
Scin tu ut tibi res se habeat? Si quicquam hodie hic turbae coeperis,
800
Faciam ut huius loci, dieique, meique, semper memineris.
Gnatho
Miseret tui me qui hunc tantum hominem facias inimicum tibi.
Chremes
Diminuam ego caput tuum hodie, nisi abis.
Gnatho
Ain vero, canis?
Sicine agis?
Thraso
Quis tu es homo? quid tibi vis? quid cum illa rei tibi est?
Chremes
Scibis: principio eam esse dico liberam.
Thraso
Tem!
Chremes
Civem Atticam.
Thraso
Hui!
Chremes
805
Meam sororem.
Thraso
805
Os durum!
Chremes
805
Miles, nunc adeo edico tibi
Ne vim facias ullam in illam. Thais, ego eo ad Sophronam
Nutricem, ut ean adducam, et signa ostendam haec.
Thraso
Tun me prohibeas
Meam ne tangam?
Chremes
Prohibeo, inquam.
Gnatho
Audin tu? hic furti se alligat.
Satis hoc tibi est.
Thraso
Idem hoc tu ais, Thais?
Thais
Quaere qui respondeat.
Thraso
810
Quid nunc agimus?
Gnatho
810
Quin redimus? Iam haec tibi aderit supplicans
Ultro.
Thraso
Credin?
Gnatho
Immo certe. Novi ingenium mulierum:
Nolunt ubi velis; ubi nolis cupiunt ultro.
Thraso
Bene putas.
Gnatho
Iam dimitto exercitum?
Thraso
Ubi vis.
Gnatho
Sanga, ita uti fortes decet
Milites, domi focique fac vicissim ut memineris.
Sangra
815
Iamdudum animus est in patinis.
Gnatho
815
Frugi es.
Thraso
815
Vos me hac sequimini.
Tap any Latin word to look it up