ὅδʼ ἐγώ, οἰοῖ, αἰακτὸς
μέλεος γέννᾳ γᾷ τε πατρῴᾳ
κακὸν ἄρʼ ἐγενόμαν.
935
πρόσφθογγόν σοι νόστου τὰν
κακοφάτιδα βοάν,
κακομέλετον ἰὰν
Μαριανδυνοῦ θρηνητῆρος
πέμψω πέμψω,
940
πολύδακρυν ἰαχάν.
ἵετʼ αἰανῆ καὶ πάνδυρτον
δύσθροον αὐδάν. δαίμων γὰρ ὅδʼ αὖ
μετάτροπος ἐπʼ ἐμοί.
ἥσω τοι τὰν πάνδυρτον,
945
σὰ πάθη τε σέβων
ἁλίτυπά τε βάρη,
πόλεως γέννας πενθητῆρος·
κλάγξω κλάγξω
δὲ γόον ἀρίδακρυν.
950
Ἰάνων γὰρ ἀπηύρα,
Ἰάνων ναύφρακτος
Ἄρης ἑτεραλκὴς
νυχίαν πλάκα κερσάμενος
δυσδαίμονά τʼ ἀκτάν.
955
οἰοιοῖ βόα καὶ πάντʼ ἐκπεύθου.—
ποῦ δὲ φίλων ἄλλος ὄχλος,
ποῦ δέ σοι παραστάται,
οἷος ἦν Φαρανδάκης,
Σούσας, Πελάγων, καὶ Δοτάμας, ἠδʼ Ἀ-
960
γδαβάτας, Ψάμμις, Σουσισκάνης τʼ
Ἀγβάτανα λιπών;
ὀλοοὺς ἀπέλειπον
Τυρίας ἐκ ναὸς
ἔρροντας ἐπʼ ἀκταῖς
965
Σαλαμινιάσι στυφελοῦ
θείνοντας ἐπʼ ἀκτᾶς.
οἰοιοῖ, βόα· ποῦ σοι Φαρνοῦχος
Ἀριόμαρδός τʼ ἀγαθός,
ποῦ δὲ Σευάλκης ἄναξ,
970
ἢ Λίλαιος εὐπάτωρ,
Μέμφις, Θάρυβις, καὶ Μασίστρας,
Ἀρτεμβάρης τʼ ἠδʼ Ὑσταίχμας;
τάδε σʼ ἐπανερόμαν.
ἰὼ ἰώ μοί μοι
975
τὰς ὠγυγίους κατιδόντες
στυγνὰς Ἀθάνας πάντες ἑνὶ πιτύλῳ,
ἐὴ ἐή, τλάμονες ἀσπαίρουσι χέρσῳ.
ἦ καὶ τὸν Περσᾶν αὐτοῦ
τὸν σὸν πιστὸν πάντʼ ὀφθαλμὸν
980
μυρία μυρία πεμπαστὰν
Βατανώχου παῖδʼ Ἄλπιστον
τοῦ Σησάμα τοῦ Μεγαβάτα,
Πάρθον τε μέγαν τʼ Οἰβάρην
ἔλιπες ἔλιπες;
985
ὢ ὢ ὢ δᾴων.
Πέρσαις ἀγαυοῖς κακὰ πρόκακα λέγεις.
ἰὼ ἰὼ δῆτα
ἴυγγʼ ἀγαθῶν ἑτάρων μοι ὑπομιμνήσκεις
990
κινεῖς ἄλαστα στυγνὰ πρόκακα λέγων.
βοᾷ βοᾷ μοι μελέων ἔντοσθεν ἦτορ.
καὶ μὴν ἄλλους γε ποθοῦμεν,
Μάρδων ἀνδρῶν μυριοταγὸν
Ξάνθιν ἄρειόν τʼ Ἀγχάρην,
995
Δίαιξίν τʼ ἠδʼ Ἀρσάκην
ἱππιάνακτας,
Κηγδαδάταν καὶ Λυθίμναν
Τόλμον τʼ αἰχμᾶς ἀκόρεστον.
ἔταφον ἔταφον,
1000
οὐκ ἀμφὶ σκηναῖς
τροχηλάτοισιν ὄπιθεν δʼ· ἑπομένους.
βεβᾶσι γὰρ τοίπερ ἀγρέται στρατοῦ.
βεβᾶσιν, οἴ, νώνυμοι.
ἰὴ ἰή, ἰὼ ἰώ.
1005
ἰὼ ἰώ, δαίμονες,
ἔθεθʼ ἄελπτον κακὸν
διαπρέπον, οἷον δέδορκεν Ἄτα.
πεπλήγμεθʼ οἵᾳ διʼ αἰῶνος τύχᾳ·
πεπλήγμεθʼ· εὔδηλα γάρ·
1010
νέᾳ νέᾳ δύᾳ δύᾳ.
Ἰάνων ναυβατᾶν.
κύρσαντες οὐκ εὐτυχῶς
δυσπόλεμον δὴ γένος τὸ Περσᾶν.
πῶς δʼ οὔ; στρατὸν μὲν τοσοῦ-
1015
τον τάλας πέπληγμαι.
τί δʼ οὔκ; ὄλωλεν μεγάλως τὰ Περσᾶν.
ὁρᾷς τὸ λοιπὸν τόδε τᾶς ἐμᾶς στολᾶς;
ὁρῶ ὁρῶ.
1020
τόνδε τʼ ὀιστοδέγμονα—
τί τόδε λέγεις σεσωσμένον;
θησαυρὸν βελέεσσιν;
βαιά γʼ ὡς ἀπὸ πολλῶν.
ἐσπανίσμεθʼ ἀρωγῶν.
1025
Ἰάνων λαὸς οὐ φυγαίχμας.
ἀγανόρειος· κατεῖ-
δον δὲ πῆμʼ ἄελπτον.
τραπέντα ναύφρακτον ἐρεῖς ὅμιλον;
1030
πέπλον δʼ ἐπέρρηξʼ ἐπὶ συμφορᾷ κακοῦ.
παπαῖ παπαῖ.
καὶ πλέον ἢ παπαῖ μὲν οὖν.
δίδυμα γάρ ἐστι καὶ τριπλᾶ—
λυπρά, χάρματα δʼ ἐχθροῖς.
1035
καὶ σθένος γʼ ἐκολούσθη—
γυμνός εἰμι προπομπῶν.
φίλων ἄταισι ποντίαισιν·
δίαινε δίαινε πῆμα· πρὸς δόμους δʼ ἴθι.
αἰαῖ αἰαῖ, δύα δύα.
1040
βόα νυν ἀντίδουπά μοι.
δόσιν κακὰν κακῶν κακοῖς.
ἴυζε μέλος ὁμοῦ τιθείς.
ὀτοτοτοτοῖ.
βαρεῖά γʼ ἅδε συμφορά.
1045
οἲ μάλα καὶ τόδʼ ἀλγῶ.
ἔρεσσʼ ἔρεσσε καὶ στέναζʼ ἐμὴν χάριν.
διαίνομαι γοεδνὸς ὤν.
βόα νυν ἀντίδουπά μοι.
μέλειν πάρεστι, δέσποτα.
1050
ἐπορθίαζέ νυν γόοις.
ὀτοτοτοτοῖ.
μέλαινα δʼ ἀμμεμείξεται,
οἴ, στονόεσσα πλαγά.
καὶ στέρνʼ ἄρασσε κἀπιβόα τὸ Μύσιον.
1055
ἄνιʼ ἄνια.
καί μοι γενείου πέρθε λευκήρη τρίχα.
ἄπριγδʼ ἄπριγδα μάλα γοεδνά.
ἀύτει δʼ ὀξύ.
καὶ τάδʼ ἔρξω.
1060
πέπλον δʼ ἔρεικε κολπίαν ἀκμῇ χερῶν.
ἄνιʼ ἄνια.
καὶ ψάλλʼ ἔθειραν καὶ κατοίκτισαι στρατόν.
ἄπριγδʼ ἄπριγδα μάλα γοεδνά.
διαίνου δʼ ὄσσε.
1065
τέγγομαί τοι.
βόα νυν ἀντίδουπά μοι.
οἰοῖ οἰοῖ.
αἰακτὸς ἐς δόμους κίε.
1070
ἰὼ ἰώ, Περσὶς αἶα δύσβατος.
ἰωὰ δὴ κατʼ ἄστυ.
ἰωὰ δῆτα, ναὶ ναί.
γοᾶσθʼ ἁβροβάται.
ἰὼ ἰώ, Περσὶς αἶα δύσβατος.
ἰὴ ἰὴ τρισκάλμοισιν,
1075
ἰὴ ἰή, βάρισιν ὀλόμενοι.
πέμψω τοί σε δυσθρόοις γόοις.
Tap any Greek word to look it up