§5.1.930–5.2.1073
Hanno
930
Yth alonim ualonuth sicorathi symacom syth
chy mlachthi in ythmum ysthyalm ych-ibarcu mysehi
li pho caneth yth bynuthi uad edin byn ui
bymarob syllohom alonim ubymysyrthohom
byth limmoth ynnocho thuulech-antidamas chon
935
ys sidobrim chi fel yth chyl is chon chen liful
yth binim ys dybur ch-innocho-tnu agorastocles
yth emanethi hy chirs aelichot sithi nasot
bynu yid ch-illuch ily gubulim lasibithim
bodi aly thera ynnynu yslym min cho-th iusim
940
Ythalonimualoniuthsicorathiisthymhimihymacomsyth
combaepumamitalmetlotiambeat
iulecantheconaalonimbalumbar dechor
bats hunesobinesubicsillimbalim
esseantidamossonalemuedubertefet
945
donobun.huneccilthumucommucroluful
altanimauosduberithemhuarcharistolem
sittesedanecnasotersahelicot
alemusdubertimurmucopsuistiti
aoccaaneclictorbodesiussilimlimmimcolus
950
deos deasque veneror, qui hanc urbem colunt,
ut quod de mea re huc veni rite venerim,
measque híc ut gnatas et mei fratris filium
reperire me siritis, di vostram fidem.
quae mihi surruptae sunt et fratris filium.
955
sed hic mihi antehac hospes Antidamas fuit;
eum fécisse aiunt, sibi quod faciundum fuit.
eius fílium esse hic praedicant Agorastoclem:
ad eum hospitalem hanc tesseram mecum fero;
is in hisce habitare monstratust regionibus.
960
hos percontabor qui hinc egrediuntur foras.
Agorastocles
Ain tú tibi dixe Syncerastum, Milphio,
eas ésse ingenuas ambas surrupticias
Charthaginiensis?
Milphio
Aio, et, si frugi esse vis,
eas líberali iam adseres causa manu.
965
nam tuom flagitiumst tuas te popularis pati
servire ante oculos, domi quae fuerint liberae.
Hanno
Pro di immortales, opsecro vostram fidem,
quam orationem hanc aures dulcem devorant.
creta est profecto hórum hominum oratio,
970
ut mi apsterserunt omnem sorditudinem.
Agorastocles
Si ad eam rem testis habeam, faciam quod iubes.
Milphio
Quid tu mihi testis? quin tu insistis fortiter?
aliqua Fortuna fuerit adiutrix tibi.
Agorastocles
Incipere multost quam impetrare facilius.
Milphio
975
Sed quae illaec avis est, quae huc cum tunicis advenit?
numnam in balineis circumductust pallio?
Agorastocles
Facies quidem edepol Punicast.
Milphio
Guggast homo.
servos quidem edepol veteres antiquosque habet.
Agorastocles
Qui scis?
Milphio
Viden homines sarcinatos consequi?
980
† atque ut opinor digitos in manibus non habent.
Agorastocles
Quid iam?
Milphio
Quia incedunt cum anulatis auribus.
Hanno
Adibo hosce atque áppellabo Punice.
si respondebunt, Punice pergam loqui;
si non, tum ad horum mores linguam vertero.
Milphio
985
Quid ais tu? écquid commeministi Punice?
Agorastocles
Nihil edepol. nam qui scire potui, dic mihi,
qui illim sexennis perierim Carthagine?
Hanno
Pro di immortales, plurumi ad illum modum
periere pueri liberi Carthagine.
Milphio
990
Quid ais tu?
Agorastocles
990
Quid vis?
Milphio
990
Vin appellem hunc Punice?
Agorastocles
An scis?
Milphio
Nullus me est hodie Poenus Poenior.
Agorastocles
Adi atque appella, quid velit, quid venerit,
qui sit, quoiatis, unde sit: ne parseris.
Milphio
Avo. quoiates estis aut quo ex oppido?
Hanno
995
Anno byn mytthymballe udradait annech.
Agorastocles
Quid ait?
Milphio
Hannonem se esse ait Carthagine,
Carthaginiensis Mytthumbalis filium.
Hanno
Avo.
Milphio
Salutat.
Hanno
Donni.
Milphio
Doni volt tibi
dare hic nescio quid. audin pollicitarier?
Agorastocles
1000
Saluta hunc rursus Punice verbis meis.
Milphio
Avo donni inquit hic tibi verbis suis.
Hanno
Me har bocca.
Milphio
Istuc tibi sit potius quam mihi.
Agorastocles
Quid ait?
Milphio
Miseram esse praedicat buccam sibi.
fortasse medicos nos esse arbitrarier.
Agorastocles
1005
Si ita est, nega esse; nolo ego errare hospitem.
Milphio
Audin tu?
Hanno
Rufeyn nyccho issam.
Agorastocles
Sic volo
profecto vera cuncta huic expedirier.
roga númquid opus sit.
Milphio
Tu qui zonam non habes,
quid in hanc venistis urbem aút quid quaeritis?
Hanno
1010
Muphursa.
Agorastocles
1010
Quid ait?
Hanno
1010
Miuulec hianna.
Agorastocles
1010
Quid venit?
Milphio
Non audis? mures Africanos praedicat
in pompam ludis dare se velle aedilibus.
Hanno
Lech lachanna nilimniichto.
Agorastocles
Quid nunc ait?
Milphio
Ligulas, canalis ait se advexisse et nuces:
1015
nunc orat, operam ut des sibi, ut ea veneant.
Agorastocles
Mercator credo est.
Hanno
Assam.
Milphio
Arvinam quidem.
Hanno
Palu mirga detha.
Agorastocles
Milphio, quid nunc ait?
Milphio
Palas vendundas sibi ait et mergas datas,
ad messim credo, nisi quid tú aliud sapis.
1020
ut hortum fodiat atque ut frumentum metat.
Agorastocles
Quid istuc ad me?
Milphio
Certiorem te esse volt,
ne quid clam furtim se accepisse censeas.
Hanno
Mufonnim siccoratim.
Milphio
Hem, cave sis feceris
quod hic te órat.
Agorastocles
Quid ait aut quid orat? expedi.
Milphio
1025
Sub cratim ut iubeas se supponi átque eo
lapides imponi multos, ut sese neces.
Hanno
Gunebbal samem lyryla.
Agorastocles
Narra, quid est?
quid ait?
Milphio
Non hercle nunc quidem quicquam scio.
Hanno
At ut scias, nunc dehinc latine iam loquar.
1030
servom hercle te esse oportet et nequam et malum,
hominem peregrinum atque advenam qui inrideas.
Milphio
At hercle te hominem et sycophantam et subdolum,
qui huc advenisti nos captatum, migdilix,
bisulci lingua quasi proserpens bestia.
Agorastocles
1035
Maledicta hinc aufer, linguam compescas face.
maledicere huic tu temperabis, si sapis.
meis cónsanguineis nolo te iniuste loqui.
Carthagini ego sum gnatus, ut tu sis sciens.
Hanno
O mi popularis, salve.
Agorastocles
Et tu edepol, quisquis es.
1040
et si quid opus est, quaeso, dic atque impera
popularitatis causa.
Hanno
Habeo gratiam.
verum ego hic hospitium hábeo: Antidamae filium
quaero (commostra si novisti) Agorastoclem.
sed ecquem ádulescentem tu hic novisti Agorastoclem?
Agorastocles
1045
Siquidem Ántidamai quaeris ádoptaticium,
ego sum ipsus quem tu quaeris.
Hanno
Hem, quid ego audio?
Agorastocles
Antidamae gnatum me esse.
Hanno
Sí itast, tesseram
conferre si vis hospitalem, eccam attuli.
Agorastocles
Agedum huc ostende. est par probe, quam habeo domi.
Hanno
1050
O mi hospes, salve multum. nam mihi tuos pater
patritus † ergo hospes Antidamas fuit.
haec mi hospitalis tessera cum illo fuit.
Agorastocles
Ergo hic apud me hospitium tibi praebebitur.
nam haúd repudio hospitium neque Carthaginem,
1055
unde súm oriundus.
Hanno
1055
Di dent tibi omnes quae velis.
quid ais? qui potuit fieri, ut Carthagini
gnatus sis? hic autem habuisti Aetolum patrem.
Agorastocles
Surruptus sum illinc. hic me Antidama hospes tuos
emit, et is me sibi adoptavit filium.
Hanno
1060
Demarcho item ipse fuit adoptaticius.
sed mitto de illoc, ad te redeo. dic mihi,
ecquid meministi tuom parentum nomina,
patris atque matris?
Agorastocles
Memini.
Hanno
Memoradum mihi,
si novi forte aut si sunt cognati mihi.
Agorastocles
1065
Ampsigura mater mihi fuit, Iahon pater.
Hanno
Patrem atque matrem viverent vellem tibi.
Agorastocles
An mortui sunt?
Hanno
Factum, quod aegre tuli. †
nam mihi sobrina Ampsigura tua mater fuit;
pater tuos, is erat frater patruelis meus,
1070
et is me heredem fecit, quom suom obiit diem,
quo me privatum aégre patior mortuo.
sed sí ita est, ut tu sis Iahonis filius,
signum esse oportet in manu laeva tibi,
§5.2.1074–5.4.1196
ludenti puero quod memordit simia.
1075
ostende, inspiciam.
Agorastocles
1075
Em ostendo.
Hanno
1075
Aperi. audi atque ades:
Agorastocles
Mi patrue, salve.
Hanno
Ét tu salve, Agorastocles.
iterum mihi gnatus videor, quom te repperi.
Milphio
Pol istám rem vobis bene evenisse gaudeo.
sed te moneri num nevis?
Hanno
Sane volo.
Milphio
1080
Paterna oportet filio reddi bona.
aequomst habere hunc bona quae possedit pater.
Hanno
Haud postulo aliter: restituentur omnia;
suam síbi rem salvam sistam, si illo advenerit.
Milphio
Facito sis reddas, etsi hic habitabit, tamen.
Hanno
1085
Quin mea quoque iste habebit, si quid me fuat.
Milphio
Festivom facinus venit mi in mentem modo.
Hanno
Quid id est?
Milphio
Tua opus est opera.
Hanno
Dic mihi quid lubet:
profecto uteris, ut voles, operam meam.
quid est negoti?
Milphio
Potin tu fieri subdolus?
Hanno
1090
Inimico possum, amico ínsipientia est.
Milphio
Inimicus hercle est huius.
Hanno
Male faxim lubens.
Milphio
Amat ab lenone hic.
Hanno
Facere sapienter puto.
Milphio
Leno hic habitat vicinus.
Hanno
Male faxim lubens.
Milphio
Ei duae puellae sunt meretrices servolae
1095
sorores: earum hic alteram efflictim perit,
neque eam incestavit umquam.
Hanno
Acerba amatiost.
Milphio
Hunc leno ludificatur.
Hanno
Suom quaestum colit.
Milphio
Hic illi malam rem dare volt.
Hanno
Frugist, si id facit.
Milphio
Nunc hoc consilium capio et hanc fabricam apparo,
1100
ut te allegemus, filias dicas tuas
surruptasque esse parvolas Carthagine
manu líberali causa ámbas adseras,
quasi filiae tuae sint. iamne intellegis?
Hanno
Intellego hercle. nam mihi item gnatae duae
1105
cum nutrice una sunt surruptae parvolae.
Milphio
Lepide hercle adsimulas. iam in principio id mihi placet.
Hanno
Pol magis quam vellem.
Milphio
Eu hércle mortalem catum,
malum crudumque, estolidum et subdolum.
ut adflet, quo illud gestu faciat facilius.
1110
me quoque dolis iam superat architectonem.
Hanno
Sed earum nutrix qua sit facie, mi expedi.
Milphio
Statura hau magna, corpore aquilost.
Hanno
Ipsa east.
Milphio
Specie venusta, óre atque oculis pernigris.
Hanno
Formam quidem hercle verbis depinxti probe.
Milphio
1115
Vin eam videre?
Hanno
1115
Filias malo meas.
sed i átque evoca illam; sí eae meae sunt filiae,
si illarum est nutrix, me continuo noverit.
Milphio
Heus, ecquis hic est? nuntiate ut prodeat
foras Gíddeneni. est qui illam conventam esse volt.
Giddenes
1120
Quis pultat?
Milphio
1120
Qui te proximust.
Giddenes
1120
Quid vis?
Milphio
1120
Eho,
novistin tu illunc tunicatum hominem qui siet?
Giddenes
Nam quém ego aspicio? pro supreme Iuppiter,
erus meus hic quidem est, mearum alumnarum pater,
Hanno Carthaginiensis.
Milphio
Ecce autem mala.
1125
praestrigiator hic quidem Poenus probust,
perduxit omnis ad suam sententiam.
Giddenes
O mí ere, salve, Hánno, insperatissume
mihi tuisque filiis, salve atque—eho,
mirari noli neque me contemplarier.
1130
cognoscin Giddenenem áncillam tuam?
Hanno
Novi. sed ubi sunt meae gnatae? id scire expeto.
Giddenes
Apud aedem Veneris.
Hanno
Quid ibi faciunt? dic mihi.
Giddenes
Aphrodisia hodie Veneris est festus dies:
oratum ierunt deam, ut sibi esset propitia.
Milphio
1135
Pol satis scio, impetrarunt, quando hic hic adest.
Agorastocles
Eho an huius sunt illae filiae?
Giddenes
Ita ut praedicas.
tua pietas nobis plane aúxilio fuit,
quom huc advenisti hodie in ipso tempore;
namque hodie earum mutarentur nomina
1140
facerentque indignum genere quaestum corpore.
Pver
Auamma illi.
Giddenes
Hauon bane silli in mustine.
Mepstaetemes tas dum et alanna cestimim.
Agorastocles
Quid illí locuti sunt inter se? dic mihi.
Hanno
Matrem hic salutat suam, haec autem hunc filium.
1145
tace atque parce muliebri supellectili.
Agorastocles
Quae east supellex?
Hanno
Clarus clamor.
Agorastocles
Sine modo.
Hanno
Tu abduc hosce intro; et una nutricem simul
iube hanc abire hinc ad te.
Agorastocles
Fac quod imperat.
Milphio
Sed quís illas tibi monstrabit?
Agorastocles
Ego doctissume.
Milphio
1150
Abeo igitur.
Agorastocles
1150
Facias modo quam memores mavelim.
patruo advenienti cena curetur volo.
Milphio
Lachanna vos, quos ego iam detrudam ad molas,
inde pórro ad puteum atque ad robustum codicem.
ego faxo hospitium hoc leniter laudabitis.—
Agorastocles
1155
Audin tu, patrue? dico, ne dictum neges:
tuam míhi maiorem filiam despondeas.
Hanno
Pactam rem habeto.
Agorastocles
Spondesne igitur?
Hanno
Spondeo.
Agorastocles
Mi patrue, salve. nam nunc es plane meus.
nunc demum ego cum illa fabulabor libere.
1160
nunc, patrue, si vis tuas videre filias,
me sequere.
Hanno
Iamdudum equidem cupio, et te sequor.
Agorastocles
Quid si eámus illis obviam?
Hanno
At ne intervias
praeterbitamus metuo. magne Iuppiter,
restitue certas mi ex incertis nunc opes.
Agorastocles
1165
† Ego quidem meos amores mecum confido fore.
sed eccás video ipsas.
Hanno
Haecine meae sunt filiae?
quantae e quantillis iam sunt factae.
Agorastocles
Scin quid est?
tragicae sunt: in calones sustolli solent.
Milphio
Opino hercle hodie, quod ego dixi per iocum,
1170
id eventurum esse et severum et serium,
ut haec ínveniantur hodie esse huius filiae.
Agorastocles
Pol istúc quidem iam certum est. tu istos, Milphio,
abduce intro. nos hasce hic praestolabimur.
Adelphasivm
Fuit hódie operae pretiúm cuivis qui amábilitati animum adiceret,
1175
oculís epulas dare, délubrum qui hodie órnatum eo visére venit.
deamávi ecastor ílli hodie lepidíssima munera méretricum,
digná dea venustissimá Venere, neque cóntempsi eius opés hodie.
tanta íbi copia venustátum aderat, in suó quique loco síta munde.
arás tus, murrinus, ómnis odor complébat. haud sordére visust
1180
festús dies, Venus, nec tuóm fanum: tantús ibi clientarum érat numerus,
quae ad Cálydoniam venérant Venerem.
Anterastilis
Certo enim, quod quidem ad nos duas
attínuit, praepotentés pulchre pacísque potentes, sóror, fuimus,
neque ab iúventute inibi inrídiculo habitaé, quod pol,
soror, céteris omnibus fáctumst.
Adelphasivm
Malim ístuc aliis vídeatur, quam uti tú te, soror, conlaúdes.
Anterastilis
1185
Spero équidem.
Adelphasivm
1185
Et pól ego, quom, íngeniis quibus súmus atque aliae, gnósco;
eo súmus gnatae genere, út deceat nos ésse a culpa cástas.
Hanno
Iuppíter, qui genus colis álisque hominum, per quém vivimus vitálem aevom,
quem pénes spes vitae súnt hominum omniúm, da diem hunc sospítem quaeso,
† rebus meis agundis, ut quíbus annos multós carui quasque é patria
1190
perdidi parvas † redde is libertatem, invictae praemium ut esse sciam pietati.
Agorastocles
Omnía faciet Iuppíter faxo, nam mi ést obnoxius ét me metuít.
Hanno
Tace quaeso.
Agorastocles
Ne lácruma, patrue.
Anterastilis
Vt vólup est homini, méa soror, si quód agit cluet victória;
sicút nos hodie intér alias praestítimus pulchritúdine.
Adelphasivm
Stultá, soror, magis es quám volo. an tu éo pulchra videre, óbsecro,
1195
si tíbi illi non os óblitumst fulígine?
Agorastocles
1195
O pátrue, o patrue mí.
Hanno
1195
Quid est,
§5.4.1196b–5.5.1299
fratris mei gnate, gnate, quid vis? expedi.
§5.4.1196b–5.5.1299
Agorastocles
At enim hóc volo agas.
§5.4.1196b–5.5.1299
Hanno
At enim ágo istuc.
Agorastocles
O pátrue mi patruíssime.
Hanno
Quid est?
Agorastocles
Ést lepida et lauta. út sapit.
Hanno
Ingénium patris habet quód sapit.
Agorastocles
Quae rés? iam diu édepol sápientiám tuam haéc quidem abusast.
1200
nunc hínc sapit, hinc sentít, quidquid sapit, éx meo amore.
Adelphasivm
Nón eo genere súmus prognatae, tam étsi sumus servaé, soror,
ut deceat nos facere quicquam quod homo quisquam inrideat.
multa mulierum sunt vitia, sed hoc e multis maxumumst,
quom sibi nimis placent minusque áddunt operam, uti placeant viris.
Anterastilis
1205
Nimiae voluptatist quod in extis nostris portentumst, soror,
quodque haruspéx de ambabus dixit.
Agorastocles
Velim de me aliquid dixerit.
Anterastilis
Nos fore invíto domino nostro diebus paucis liberas.
id ego nisi quid di aut parentes faxint, qui sperem hau scio.
Agorastocles
Mea fiducia hercle haruspex, patrue, his promisit, scio,
1210
libertatem, quia me amare hanc scit.
Adelphasivm
1210
Soror, sequere hac.
Anterastilis
1210
Sequor.
Hanno
Prius quam abitis, vos volo ambas. nisi piget, consistite.
Adelphasivm
Quis revocat?
Agorastocles
Qui bene volt vobis facere.
Adelphasivm
Facere occasiost.
sed quis homost?
Agorastocles
Amicus vobis.
Adelphasivm
Qui quidem inimicus non siet.
Agorastocles
Bonus est hic homo, mea voluptas.
Adelphasivm
Pol istum malim quam malum.
Agorastocles
1215
Siquidem amicitiast habenda, cum hoc habendast.
Adelphasivm
1215
Hau precor.
Agorastocles
Multa bona volt vobis facere.
Adelphasivm
Bonus bonis bene feceris.
Hanno
Gaudio ero vobis.
Adelphasivm
At edepol nos voluptati tibi.
Hanno
Libertatique.
Adelphasivm
Istoc pretio tuas nos facile feceris.
Agorastocles
Patrue mi, ita me di amabunt, ut ego, si sim Iuppiter,
1220
iam hercle ego illam uxorem ducam et Iunonem extrudam foras.
ut pudice verba fecit, cogitate et commode,
ut modeste orationem praebuit.
Hanno
Certo haec meast.
sed ut astú sum adgressus ad eas.
Agorastocles
Lepide hercle atque commode.
Hanno
Pergo etiam temptare?
Agorastocles
In pauca confer: sitiunt qui sedent.
Hanno
1225
Quid istic? quod faciundumst cur non agimus? in ius vos voco.
Agorastocles
Nunc, pátrue, tu frugí bonae es. tené. vin ego hanc adpréndam?
Adelphasivm
An patruos est, Agorastocles, tuos hic?
Agorastocles
Iam faxo scibis.
nunc pol ego te ulciscar probe, nam faxo—mea eris sponsa.
Hanno
Ite in ius, ne moramini. antestare me atque duce.
Agorastocles
1230
Ego te antestabor, postea hanc amabo atque amplexabor.
sed illúd quidem volui dícere—immo hercle díxi quod volebam.
Hanno
Moramini. in ius vos voco, nisi honestiust prehendi.
Adelphasivm
Quid in iús vocas nos? quid tibi debemus?
Agorastocles
Dicet illi.
Adelphasivm
Etiam me meae latrant canes?
Agorastocles
At tu hercle adludiato:
1235
dato mihi pro offa savium, pro ósse linguam obicito.
ita hanc canem faciam tibi oleo tranquilliorem.
Hanno
Ite si ítis.
Adelphasivm
Quid nos fecimus tibi?
Hanno
Fures estis ambae.
Adelphasivm
Nosne tíbi?
Hanno
Vos inquam.
Agorastocles
Atque ego scio.
Adelphasivm
Quid id fúrtist?
Agorastocles
Hunc rogato.
Hanno
Quia annos multos filias meas célavistis clam me,
1240
atque equidem ingenuas liberas summoque genere gnatas.
Adelphasivm
Numquam mecastor reperies tu istuc probrum penes nos.
Agorastocles
Da pignus, ni nunc perieres, in savium, uter utri det.
Adelphasivm
Nil tecum ago, apscede opsecro.
Agorastocles
Atque hércle mecum agendum est.
nam hic patruos meus est, pro hoc mihi patronus sim necesse est;
1245
et praedicabo quo modo vos furta faciatis multa
quoque modo húius filias apud vós habeatis servas,
quas vos ex patria liberas surruptas esse scitis.
Adelphasivm
Vbi sunt eae? aut quas, opsecro?
Agorastocles
Satis iám sunt maceratae.
Hanno
Quid si eloquamur?
Agorastocles
Censeo hercle, patrue.
Adelphasivm
Misera timeo,
1250
quid hoc sít negoti, mea soror; ita stupida sine animo asto.
Hanno
Advortite animum, mulieres. primum, si id fieri possit,
ne indigna indignis di darent, id ego evenire vellem;
nunc quod boni mihi di danunt, vobis vostraeque matri,
eas dís est aequom gratias nos agere sempiternas,
1255
quom nostram pietatem adprobant decorantque di immortales.
vos meae estis ambae filiae et hic ést cognatus vester,
huiusce fratris filius, Agorastocles.
Adelphasivm
Amabo,
num hi falso oblectant gaudio nos?
Agorastocles
At ita me di servent,
ut hic páter est vester. date manus.
Adelphasivm
Salve, insperate nobis
1260
pater, té complecti nos sine.
Anterastilis
1260
Cupite atque exspectate
pater, salve.
Adelphasivm
Ambae filiae sumus.
Anterastilis
Amplectamur ambae.
Agorastocles
Quis me amplectetur postea?
Hanno
Nunc ego sum fotunatus,
multorum annorum miserias nunc hac voluptate sedo.
Adelphasivm
Vix hoc videmur credere.
Hanno
Magis quí credatis dicam.
1265
nam vostra nutrix † primum me cognovit.
Adelphasivm
1265
Vbi ea, amabo, est?
Hanno
Apud hunc est.
Agorastocles
Quaeso, qui lubet tam diu tenere collum?
omitte saltem tu altera. nolo ego istuc.
Adelphasivm
Enicas me.
prius quám tibi desponderit.
Agorastocles
Mitto.
Adelphasivm
Sperate, salve.
Hanno
Condamus alter alterum ergo in nervom bracchialem.
1270
quibus núnc in terra melius est?
Agorastocles
1270
Eveniunt digna dignis.
Hanno
Tandem huic cupitum contigit.
Agorastocles
O Apella, o Zeuxis pictor,
cur numero éstis mortui, hoc exemplo ut pingeretis?
nam alios pictores nil moror huius modi tractare exempla.
Hanno
Dí deaeque omnes, vóbis habeo mérito magnas grátias,
1275
quom hac me laetitia adfecistis tanta et tantis gaudiis,
ut meae gnátae ad me redirent in potestatem meam.
Adelphasivm
Mi pater, tua pietas plane nobis auxilio fuit.
Agorastocles
Patrue, facito in memoria habeas, tuam maiorem filiam
mihi te despondisse.
Hanno
Memini.
Agorastocles
Et dotis quid promiseris.
Antamonides
1280
Si ego minam non ultus fuero probe, quam lenoni dedi,
tum profecto me sibi habento scurrae ludificatui.
is etiam me ad prandium ad se abduxit ignavissimus,
ipse abiit foras, mé reliquit pro atriensi in aedibus,
ubi nec leno néque illae redeunt, nec quod edim quicquam datur.
1285
pro maiore parte prandi pignus cepi, abii foras;
sic dedero: aere militari tetigero lenunculum.
nanctus est hominem, mina quem argenti circumduceret.
sed mea amica nunc mihi irato obviam veniat velim:
iam pol ego illam pugnis totam faciam uti sit merulea,
1290
ita replebo átritate, átrior multo ut siet,
quam Aegyptini, qui cortinam ludis per circum ferunt.
Anterastilis
Tene sis me arte, mea voluptas; male ego metuo miluos,
mala illa bestia est, ne forte me auferat pullum tuom.
Adelphasivm
Vt nequeo te satis complecti, mi pater.
Antamonides
Ego me moror.
1295
propemodúm hoc opsonare prandium potero mihi.
sed quid hoc ést? quid est? quid hóc est? quid ego video? quo modo?
quid hoc est conduplicationis? quae haec est congeminatio?
quis hic homo est cum tunicis longis quasi puer cauponius?
satin ego oculis cerno? estne illaec mea amica Anterastilis?
§5.5.1300–5.7.1422b
1300
et ea est certo. iam pridem ego me sensi nihili pendier.
non pudet puellam ámplexari baiolum in media via?
iam hercle ego illum éxcruciandum totum carnufici dabo.
sane genus hoc mulierosumst tunicis demissiciis.
sed adire certum est hanc amatricem Africam.
1305
heus tu, tibi dico, mulier, ecquid te pudet?
quid tibi negoti est autem cum istac? dic mihi.
Hanno
Adulescens, salve.
Antamonides
Nolo, nihil ad te attinet.
quid tibi hanc digito tactio est?
Hanno
Quia mihi lubet.
Anterastilis
Lubet?
Hanno
Ita dico.
Anterastilis
Ligula, i in malam crucem.
1310
tune hic amator audes esse, hallex viri,
aut contrectare quod mares homines amant?
deglupta mena, sarrapis, sementium,
manstruca, halagora, sampsa, tum autem plenior
ali ulpicique quam Romani remiges.
Agorastocles
1315
Num tibi, adulescens, malae aut dentes pruriunt,
qui huic es molestus, an malam rem quaeritas?
Antamonides
Quin adhibuisti, dum istaec loquere, tympanum?
nam te cinaedum esse arbitror magis quam virum.
Agorastocles
Scin quam cinaedus sum? ite istinc, servi, foras,
1320
ecferte fustis.
Antamonides
1320
Heus tu, si quid per iocum
dixi, nolito in serium convertere.
Anterastilis
Qui tibi lubido est, opsecro, Antamonides,
loqui inclementer nostro cognato et patri?
nam hic noster pater est; hic nos cognovit modo
1325
et hunc sui fratris filium.
Antamonides
1325
Ita me Iuppiter
bene amet, bene factum. gaudeo et volup est mihi,
si quid lenoni óptigit magni mali.
quomque e virtute vobis fortuna optigit.
Anterastilis
Credibile ecastor dicit. crede huic, mi pater.
Hanno
1330
Credo.
Agorastocles
1330
Et ego credo. sed eccum lenonem Lycum.
Bonum virum eccum video, se recipit domum;
Hanno
Quis hic est?
Agorastocles
Vtrumvis est, vel leno vel Lycus.
in servitute hic filias habuit tuas
1335
et mi auri fur est.
Hanno
1335
Bellum hominem, quem noveris.
rapiamus in ius.
Minime.
Agorastocles
Quapropter?
Hanno
Quia
†iniuriarum multo induci satius est.
Lycvs
Decipitur nemo, mea quidem sententia,
qui suis amicis narrat recte res suas;
1340
nam omnibus amicis meis idem unum convenit,
ut me suspendam, ne addicar Agorastocli.
Agorastocles
Leno, eamus in ius.
Lycvs
Opsecro te, Agorastocles,
suspendere ut me liceat.
Hanno
In ius te voco.
Lycvs
Quid tibi mecum autem?
Hanno
Quia hasce aio liberas
1345
ingenuasque esse filias ambas meas;
eae súnt surruptae cum nutrice parvolae.
Lycvs
Iam pridem equidem istuc scivi, et miratus fui,
neminem venire qui istas adsereret manu.
meae quidem profecto non sunt.
Antamonides
Leno, in ius eas.
Lycvs
1350
De prandio tu dicis. debetur, dabo.
Agorastocles
Duplum pro furto mi opus est.
Lycvs
Sume hinc quid lubet.
Hanno
Et mihi suppliciis multis.
Lycvs
Sume hinc quid lubet:
Antamonides
Et mihi quidem mina argenti.
Lycvs
Sume hinc quid lubet.
collo rem solvam iam omnibus, quasi baiolus.
Agorastocles
1355
Numquid recusas contra me?
Lycvs
1355
Haud verbum quidem.
Agorastocles
Ite igitur intro, mulieres. sed patrue mi,
tuam, ut dixisti, mihi desponde filiam.
Hanno
Haud aliter ausim.
Antamonides
Bene vale.
Agorastocles
Et tu bene vale.
Antamonides
Leno, arrabonem hoc pro mina mecum fero.—
Lycvs
1360
Perii hercle.
Agorastocles
1360
Immo haud multo post, si in ius veneris.
Lycvs
Quin egomet tibi me addico. quid praetore opust?
verum obsecro te, ut liceat simplum solvere,
trecentos Philippos; credo conradi potest:
cras auctionem faciam.
Agorastocles
Tantisper quidem
1365
ut sis apud me lignea in custodia.
Sequere intro, patrue mi, út hunc festum diem
Lycvs
Fiat.
Agorastocles
habeamus hilare, huius malo et nostro bono.
multum valete. multa verba fecimus;
malum postremo omne ad lenonem reccidit.
1370
nunc, quod postremum est condimentum fabulae,
si placuit, plausum postulat comoedia.—
Quam rém agis, miles? qui lubet patruo meo
loqui inclementer? ne mirere, mulieres
quod eum secuntur: modo cognovit filias
1375
suas ésse hasce ambas.
Lycvs
1375
Hem, quod verbum aures meas
tetigit? nunc perii.
Antamonides
Vnde haec perierunt domo?
Agorastocles
Carthaginienses sunt.
Lycvs
At ego sum perditus.
illuc ego metui semper, ne cognosceret
eas áliquis, quod nunc factumst. vae misero mihi,
1380
periere, opinor, duodeviginti minae,
qui hasce emi.
Agorastocles
Et tute ipse periisti, Lyce.
Hanno
Quis hic est?
Agorastocles
Vtrumvis est, vel leno vel Lycus.
in servitute hic filias habuit tuas,
et mi auri fur est.
Hanno
Bellum hominem, quem noveris.
Antamonides
1385
Leno, rapacem te esse semper credidi,
verúm etiam furacem qui norunt magis.
Lycvs
Accedam. per ego tua te genua óbsecro
et hunc, cognatum quem tuom esse intellego:
quando boni estis, ut bonos facere addecet
1390
faciatis, vestro subveniatis supplici.
iam pridem equidem istas scivi ésse liberas
et exspectabam, si qui eas ássereret manu.
nam non meae sunt prosum. tum autem aurum tuom
reddam, quod apud me est, et iusiurandum dabo,
1395
me malitiose nil fecisse, Agorastocles.
Agorastocles
Quid mihi par facere sit, ego mecum consulam.
omitte genua.
Lycvs
Mitto, si ita sententia est.
Quid lenonem vis inter negotium?
Antamonides
Heús tu leno.
Vt minam mi argenti reddas, prius quam in nervom abducere.
Lycvs
1400
Di meliora faxint.
Antamonides
1400
Sic est: hodie cenabis toris.
aurum argentum collum, leno, tris res nunc debes simul.
Hanno
Quid me in hac re facere deceat, egomet mecum cogito.
si volo hunc ulcisci, litis sequar in alieno oppido,
quantum audivi ingenium et mores eius quo pacto sient.
Adelphasivm
1405
Mi pater, ne quid tibi cum istoc rei sit pessumo, obsecro.
Anterastilis
Ausculta sorori. abi, díiunge inimicitias cum improbo.
Hanno
Hoc age sis, leno. quamquam ego te meruisse ut pereas scio,
non experiar tecum.
Agorastocles
Neque ego; si aurum mihi reddes meum,
leno, quando ex nervo emissu'semissus es — compingare in carcerem.
Lycvs
1410
Iamne autem ut soles?
Antamonides
1410
Ego, Poene, tibi me purgatum volo.
si quid dixi iratus advorsum animi tui sententiam,
id uti ignoscas quaeso; et quom istas invenisti filias,
ita me di ament ut mihi volup est.
Hanno
Ignosco et credo tibi.
Antamonides
Leno, tu autem amicam mihi des facito aut auri mihi reddas minam.
Lycvs
1415
Vin tibicinam meam habere?
Antamonides
1415
Nil moror tibicinam;
nescias, utrum ei maiores buccaene an mammae sient.
Lycvs
Dabo quae placeat.
Antamonides
Cura.
Lycvs
Aúrum cras ad te referam tuom.
Agorastocles
Facito in memoria habeas.
Lycvs
Miles, sequere me.—
Antamonides
Ego vero sequor.—
Agorastocles
Quid ais, patrue? quando hinc ire cogitas Carthaginem?
1420
nam tecum mi una ire certum est.
Hanno
1420
Vbi primum potero, ilico.
Agorastocles
Dum auctionem facio, hic opus est aliquot ut maneas dies.
Hanno
Faciam ita ut vis.
Agorastocles
Age sis, eamus, nos curemus. plaudite.
Tap any Latin word to look it up